Estuarioen eta itsasoen kudeaketa jasangarrian aditu handienak biltzen dira Euskadin

• AZTI zentro teknologikoak Elsevier argitaletxe akademikoarekin eta Estuarioko eta Kostaldeko Zientzien Elkartearekin batera lan egiten du ECSA sinposioaren 59. edizioaren antolakuntzan

• Gipuzkoako hiriburua itsas ingurunearen zaintzan espezializatutako komunitate zientifikoaren topagune bihurtuko da irailaren 5etik 8ra, mundu osoko 45 herrialdetako 500 ikertzaile ingururekin

• Kursaalen egingo den kongresuaren esparruan, gainera, AZTIren udako ikastaroaren 18. edizioa egingo da Donostiako Akuarioan

Pasaia, 2022ko irailaren 5a – Euskadik estuarioen eta itsasoen kudeaketa jasangarrian aditu handienak bilduko ditu gaurtik ostegunera arte ECSA kongresuaren 59. edizioan. AZTI zentro teknologikoak, Elsevier argitaletxe akademikoarekin eta Estuarioko eta Kostaldeko Zientzien Elkartearekin (ECSA, ingelesezko sigletan) batera, nazioarteko topaketa hau antolatzen du, gaia itsas inguruneko ezagutza zientifikoa itsasoaren kudeaketa jasangarrian erabiltzeko delarik.

ECSA elkartearen 50. urteurrenarekin bat egiten du lau jardunalditako kongresuak,  Donostiako Kursaalean ospatuko dena, eta mundu osoko 45 herrialdetako 500 ikertzaile inguru bilduko dituena, kostaldeko ekosistemen kudeaketa jasangarriaren erronka globalak azaltzeko.

“Estuarioek eta kostaldeko itsasoek giza jarduerek eragindako presio ugariei egin behar diete aurre. Horren ondorioz, habitatak eta biodibertsitatea galtzen dira, espezie inbaditzaileak edo hondakin kutsatzaileak sartzen dira, baliabideak gehiegi ustiatzen dira eta itsasoaren osasun-egoera hondatzen da. Gainera, klima-aldaketa izugarri aldatzen ari da itsas sistemen egitura eta funtzionamendua. Egoera hori iraultzeko, beharrezkoa da ahalik eta ezagutza zientifiko onenetan oinarritutako kudeaketa-neurriak aplikatzea”, azaldu du Angel Borja doktoreak, AZTIko ikertzaile nagusi eta kongresuaren antolatzaileak.

ECSA 59 konferentziaren gaia hauxe da: estuarioen eta kostaldeen kudeaketa iraunkorrerako ezagutza zientifikorik onena erabiliz. Ekitaldiak gai horrekin lotutako alderdi guztiak jorratuko ditu 44 saio, 274 ahozko aurkezpen eta 197 posterren bidez: itsasertzeko itsasoen behaketa eta monitorizazioa, itsas ingurunearen osasun-egoeraren ebaluazioa, landa-metodoen eta laborategiaren garapena, klima-aldaketa, sistema degradatuen leheneratzea edo itsasoak aurrez aurre dituen arazoetarako konponbideak.

Era berean, programak bost hitzaldi gonbidatu izango ditu, beste gai batzuk jorratzeko: nola handitu kostaldeko erresilientzia uholdeen eta higaduraren aurrean; naturan oinarritutako irtenbideak hiriko kostaldeetarako; hondartzetarako arazoak eta irtenbideak; itsas ekosistemetako etorkizuneko aldaketen simulazioa; eta energia berriztagarriek arrantzategietan eta itsasoko plangintza espazialean duten eragina.

Angel Borja doktoreak gaineratu duenez, “nazioarteko lankidetza eta diziplina anitzeko taldeen parte-hartzea lagungarria izan daiteke estuarioetan eta itsasoetan egiten ditugun jarduerak kudeatzeko, jarraipen-, azterketa- eta ebaluazio-tresna berriak erabiliz eta, azken batean, zientzia irekirantz aurrera eginez”.

Udako ikastaroa Akuarioan

Konferentziaren esparruan, AZTI Summer School udako ikastaroaren 18. edizioa egingo da irailaren 8an eta 9an Donostiako Akuarioan. Gainera, AZTIko Angel Borja doktoreak koordinatutako eta Europar Batasuneko Horizon programak finantzatutako GES4SEAS proiektu europarrari lotutako ekimenen artean lehena izango da.

ECSA 59ren programa osoa eskuragarri dago ekitaldiaren webgune ofizialean.