AZTIk Ikertzaileen Europako Gauarekin bat egiten du

Irailaren 26an Europa osoko hirietan ospatuko da Ikertzaileen Europako Gaua, zientzia herritarrengana hurbiltzea helburu duen ekitaldi berezia. 460 hiri baino gehiagotan zabalduko dira zientziaren ateak, ikerketa gizartean duen eragin positiboa erakusteko eta belaunaldi berrien jakin-mina pizteko.

Ekitaldi hau Europako Batzordeak finantzatzen du, Horizonte Europa programaren barruan Marie Sklodowska-Curie Ekintzen (MSCA) bidez. Helburuetako bat da genero-oztopoak gainditzea eta gazte gehiago, bereziki neskak, etorkizuna zientziako eta teknologiako ibilbideetan eraikitzera animatzea.

AZTI-n, ozeanoetan, elikaduran eta jasangarritasunean espezializatutako ikerketa-zentro gisa, helburu horiekin guztiz bat egiten dugu. Gure parte-hartzea aukera aparta izango da gure proiektuak haur, gazte eta familiengana hurbiltzeko, ikasketa eta dibertsioa uztartzen dituzten proposamen dinamiko eta parte-hartzaileen bidez.

Zientzia gertukoa, elikadura osasungarriago eta jasangarriago baterako

Bilboko Areatzan, gure lankide Elena Santa Cruz-ek Food Educators proiektuaren bidez elikadura osasungarri eta jasangarriari buruzko gune batean parte hartuko du.

Stand honetan, txikienek jolasaren bidez ikasiko dute zer den benetako janaria eta zergatik haurtzaroan hartzen ditugun ohiturek gure osasuna baldintzatzen duten helduaroan. Argazki eta fruta, barazki, haragi eta arrainen poster didaktikoen bidez, haurrek modu praktikoan ikasiko dute elikagai orekatuak aukeratzen.

Familiek ere aukera izango dute supermerkatuan saltzen diren produktuen etiketak irakurtzen eta interpretatzen ikasteko, kontsumo-erabaki arduratsuak hartzeko funtsezko gaitasuna baita. Halaber, food waste edo elikagai-hondakinen kontzeptua jorratuko da, eta Salvacomidas programan oinarritutako aholku praktikoak partekatuko dira (hau ere Food Educators-ekoa), alferrik galtzen ditugun elikagaien kopurua murrizteko.

Azkenik, azpimarratuko da hain sinplea eta, aldi berean, funtsezkoa den zerbait: poliki jatea eta elikagai osasungarriak gozatzea. Izan ere, ohitura horiek txikitatik sustatzeak ez du soilik elikadura hobea ekartzen, baizik eta gaixotasun batzuk —hala nola minbizia— prebenitzen laguntzen du.

Informazio gehiago hemen.

Itsasoaren indarra, energia-iturri gisa

AZTI Oregaua espazioan ere izango da, ORE4citizens ekimenaren baitan. Proiektu honek gizarteari hurbildu nahi dizkio itsas energiaren aukera berriztagarriak (Offshore Renewable Energy – ORE), eta Euskal Herriak alor horretan nazioarteko erreferente gisa duen papera azpimarratu.

Barakaldoko Lasesarre kiroldegira hurbiltzen direnek hainbat jardueratan parte hartu ahal izango dute. Besteak beste, gure lankide Iratxe Menchaca eta Javi Franco-rekin karta-joko batean jolasteko aukera izango dute (SafeWAVE proiektuaren esparruan sortua), ingurumen-inpaktuen ebaluazioari, itsas plangintza espazialari eta gizartearen energia berriztagarri itsasoei buruzko onarpenari lotuta. Gainera, zaintza-kanpainetako bideo eta irudiak erakutsiko dira, baita erabilitako zenbait tresna ere.

Gure konpromisoa: STEAM bokazioak piztea

AZTIren parte-hartzea ez da soilik ezagutza partekatzera mugatzen. Gure misioa da, era berean, STEAM bokazioak (zientzia, teknologia, ingeniaritza, artea eta matematika) inspiratzea. Haur eta gazteei erakutsi nahi diegu zientzia ez dela soilik ikasten den zerbait, bizi egiten dela, gozatzen dela eta partekatzen dela ere bai.

Hurrengo belaunaldiek, generoari begiratu gabe, deskubri dezatela eurak ere protagonista izan daitezkeela erronka global handiei aurre egiteko: elikadura osasungarriago eta jasangarriagoa bermatzea edo aldaketa klimatikoa geldiarazten lagunduko diguten energia garbiak sustatzea.

Zure zain gaude 

Ikerlartzaileen Europako Gaua irailaren 26an ospatuko da: Bilboko Areatzan 17:30etik 21:30era, eta Oregaua Barakaldoko Lasesarre kiroldegian 17:00etatik 22:00etara.

AZTItik gonbidapena luzatzen dizugu zure familiarekin gerturatzeko, esperimentatzeko, galdetzeko eta zientzia beste modu batean bizitzeko. Izan ere, jakintza eta ilusioa partekatuz bakarrik eraiki ahal izango dugu gizarte informatuago, jasangarriago eta berritzaileago bat.