Arrantza flotaren eraldaketa digitala: AZTIk industriaren etorkizuna aztertzen du AArekin eta soluzio jasangarriekin

• AZTIren txosten berri batek arrantzaren jasangarritasuna hobetu, flotaren digitalizazioa sustatu eta ingurumen inpaktua murriztu dezaketen berrikuntza teknologikoak aurkezten ditu. 

• Adibide praktikoen bidez, zentroak soluzio eraginkorrak nabarmentzen ditu erronkei aurre egiteko, hala nola klima aldaketari, erregaien prezioen igoerari, kontsumo ereduen aldaketei eta erregulazio berriei. 

Sukarrieta, 2025eko apirilaren 8a – Europako arrantza sektoreak ia 120.000 pertsonari ematen die enplegu zuzena, eta 3,49 milioi tona harrapaketa sortzen ditu, guztira, 6.600 milioi euroko balioarekin, 2022ko azken datu eskuragarrien arabera. Industria horrek eragin ekonomiko nabarmena du kontinentean, baina klima aldaketak, erregaien prezioen gorakadak, kontsumo ereduen aldaketek eta erregulazio zorrotzek epe luzerako jasangarritasuna arriskuan jartzen dute. 

Egoera horren aurrean, AZTI zentro teknologikoak, arrantza sektoreari aplikatutako ikerketan duen esperientzia zabalarekin, txosten bat argitaratu du, sortzen ari diren teknologiek arrantza jasangarriago eta eraginkorrago batean nola lagun dezaketen aztertzen duena. 

Arrantza-sektorearen eraldaketa digitala 

Txostenean, AZTIk Adimen Artifizialak (AA) Europako arrantza flotaren eraldaketa digitalerako eskaintzen dituen aukerak nabarmentzen ditu, funtsezko bi helbururekin: efizientzia operatiboa hobetzea eta harrapaketen kontrola eta trazabilitatea optimizatzea. 

Berrikuntza-gune nagusietako bat arrantza-eraginkortasuna da. Txostenak nabarmentzen du, besteak beste, oso baliagarria dela frogatu duela algoritmo prediktiboen garapena, Bizkaiko golkoko flota pelagikoan funtsezkoak diren espezieentzat bereziki diseinatuak, hala nola antxoarentzat eta atunarentzat. Algoritmo horiei esker, harrapatzeko probabilitate handieneko eremuak identifika daitezke, eta horrek erregaiaren kontsumoa eta itsasontzien emisioak murrizten laguntzen du. 

Bestalde, ikusmen artifiziala funtsezko tresna da sektorea modernizatzeko. Itsasontzietako harrapaketak automatikoki identifikatzeko, sailkatzeko eta zenbatzeko duen gaitasunak itsas baliabideen kudeaketa eraginkorragoa errazten du, arrain populazioen ustiapen arduratsu eta jasangarria erraztuz. 

Arrantzaren ingurumen-inpaktua murrizteko berrikuntza 

Berrikuntza teknologikoa funtsezkoa da arrantza-industriaren ingurumen-inpaktua arintzeko. Erronka nagusien artean daude berotegi efektuko gasen emisioak murriztea eta arrantza flota deskarbonizatzea. 

“Arrantza-flota askotarikoa denez, ez dago kasu guztietan aplika daitekeen irtenbide bakarra. Ontzi motaren, arrantza-artearen edo arrantza-eremuaren arabera, funtsezkoa da egoera bakoitzaren ebaluazio zehatza egitea. Hortik abiatuta, estrategia egokituak ezar ditzakegu, soluzioak konbinatzeko, hala nola erregaiaren kontsumoa optimizatzea, ontzietan material berriak erabiltzea, energia alternatiboak eta eraginkortasun operatiboa hobetzea ”, azaldu du Gorka Gabiñak, AZTIko Arrantza Teknologia Jasangarrien arloko koordinatzaileak. 

Txostenak ekonomia zirkularreko estrategiak ere nabarmentzen ditu, itsas hondakinak murrizteko modu eraginkor gisa. Bastertutako arrantza-aparailuen balorizazioa eta arrantza-diseinuetan material biodegradagarriak edo berritzaileak hartzea dira jasangarritasuna berrikuntzarekin konbinatzeko moduaren adibideak. “Itsas hondakinak biltzeko eta kudeatzeko sistemak eskala handian ezartzeko azpiegitura egokiak oraindik beharrezkoak diren arren, irtenbide horiek sustatzeak nabarmen hobetu dezake itsas ingurunearen osasuna, eta aukera ekonomiko berriak sor ditzake”, gaineratu du Gabiñak. 

Arrantzarekin lotutako beste arazo bat nahi ez diren espezieak harrapatzea da, arrain gazteak, marrazoak, itsas dortokak, hegaztiak edo zetazeoak barne. Fenomeno horrek ondorioak ditu ingurumen, ekonomia eta araudi mailan, eta AZTIk eraginkorrak diren  hainbat irtenbide aurkezten ditu. 

Monitorizazio elektronikoko sistemak – bideo kamerak, sentsoreak, GPSa eta datuak aztertzeko softwarea konbinatzen dituztenak, harrapaketei buruzko informazio zehatza denbora errealean emateko –; arrantza aparailuetako berrikuntza teknikoak; edo ustekabean harrapatutako itsas fauna askatzeko gailu berritzaileak, AZTIk oso informazio praktikoa eskaintzen du arrantza sektorean jasangarritasuna sustatzeko. 

Teknologia arrantza jasangarrirako memoria. AZTI

Galdetegia osatu eta emailez bidaliko dizugu memoria deskargatzeko esteka.