FUTPES - KLIMA-ALDAKETA ETA ARRANTZA

Testuingurua

Klima-aldaketa itsas espezie askoren banaketa aldatzen ari da. Ozeanoaren tenperaturaren igoerak populazio asko latitude handiagoetara mugitzea eragiten du, eta horrek ondorioak ditu bai ekosistemen funtzionamenduan, bai arrantzan eta arrantza-kudeaketako sistemetan.

Bizkaiko golkoan, itsas azaleko tenperatura hamarkadako 0,22 °C igo da 1980ko hamarkadaz geroztik. Aldaketa horiek orain arte ustiatu izan diren espezieen eskuragarritasuna alda dezakete, eta, aldi berean, hegoalderagoko eremuetatik datozen beste espezie batzuk iristea edo bertan finkatzea erraztu.

Merkataritza-interesa duten zer espezie finka daitezkeen Bizkaiko golkoan aurreikustea funtsezkoa da arrantza-sektorearen egokitzeko gaitasuna hobetzeko. Testuinguru horretan, proiektuak arrantza-interes potentziala duten eta 2040ra bitartean beren banaketa eremu horretara zabal dezaketen arrainak, zefalopodoak eta krustazeoak aztertuko ditu, informazio zientifikoa, datu historikoak, adituen ezagutza eta klima-eszenatokiak uztartuta.

Helburuak

Proiektuaren helburu nagusia da klima-aldaketako eszenatokietan Bizkaiko golkoan sortzen ari diren arrantza-baliabide bihurtzeko potentziala duten itsas espezieak identifikatzea eta lehenestea, arrantza-sektorearentzat etorkizunean sor daitezkeen aukerei aurrea hartzeko oinarri zientifikoa eskainiz.

• Ozeanoaren berotzearekin lotutako aldaketa biogeografikoak ezaugarritzea, espezieen banaketa, tropikalizazio-prozesuak eta Atlantikoko ipar-ekialdera ur epelagoekiko afinitatea duten espezieen iritsiera aztertuz.
• Hegoalderagoko eskualdeetan ustiatzen diren espezieen inbentarioa egitea, Portugal, Cadizko golkoa, Maroko eta Mauritania barne, gaur egun Bizkaiko golkoan ez dauden edo presentzia txikia duten baliabideak identifikatzeko.
• Irizpide ekologikoak, arrantzakoak eta kontserbaziokoak aplikatzea espezie hautagaiak aukeratzeko, haien merkataritza-interesa, kontserbazio-egoera, izaera ez-inbaditzailea eta klima-aldaketarekin lotutako hedapen-zantzuak kontuan hartuta.
• Espezie hautagaiak irizpide anitzeko ikuspegi baten bidez lehenestea, ustiatutako biomasari, banaketa geografikoari eta aztertutako eskualdeetan behatutako tropikalizazio-prozesuei egiten dieten ekarpenari buruzko informazioa integratuta.
• Etorkizuneko prospekzio-azterketetarako lehentasunezko espezieen zerrenda bat sortzea, egungo eta etorkizuneko banaketa modelizatzeko —2040ko horizontearekin— eta klima-eszenatokietan arrantza-ustiapenerako aukera berriak ebaluatzeko oinarri izan dadin.

Espero diren emaitzak

Proiektuak ingurumen-baldintzen aldaketen ondorioz Bizkaiko golkoan agertu edo finka daitezkeen espezieei buruzko ezagutzaren egoera eguneratua eskainiko du.

Datu historikoen eta egungo datuen azterketatik abiatuta, Bizkaiko golkorantz hedatzeko potentziala duten espezie hautagaiak identifikatuko dira, eta haien etorkizuneko banaketa 2040ra arteko ozeano-berotzearen eszenatokietan ebaluatzeko beharrezkoa den informazio biologikoa eta ingurumenekoa bilduko da.

Espezieen hautaketa, gainera, ezagutza zientifikoarekin eta arrantza-sektorearen esperientzia profesionalarekin kontrastatuko da.

Espero den inpaktua

Proiektuak arrantza-sektoreak eta hura kudeatzeaz arduratzen diren erakundeek itsas baliabideen banaketan gertatzen diren aldaketei aurrea hartzeko duten gaitasuna indartzen lagunduko du.

Bizkaiko golkoan zer espeziek presentzia handiagoa izan dezaketen aldez aurretik identifikatzeak oinarri zientifikoa emango du arrantza-aukera berriak eta egokitzapen-beharrak baloratzeko.

Ezagutza horrek klima-aldaketaren aurrean kudeaketa malguagoa eta erresilienteagoa sustatuko du, gaur egun ustiatzen diren espezieetan izan daitezkeen ondorioak ez ezik, sektorearentzat interes potentziala duten baliabide berrien agerpena ere kontuan hartuta.

Finantzaketa