INDAGA

Testuingurua

Aingira europarra (Anguilla anguilla) egoera kritikoan dago, bai mundu mailan, bai Euskal Autonomia Erkidegoan. Kudeaketa Plana hamarkada bat baino gehiagoz aplikatu den arren, ez da berreskurapen-zantzurik hauteman: erreklutamenduak oso maila baxuetan jarraitzen du, eta, EAEn, zilar-aingiraren biomasa jatorrizko biomasaren % 10 ingurukoa da, espeziea berreskuratzeko ezarritako % 40ko ihes-helburutik urrun.

Egoera horrek bere horretan jarraitzen du, nahiz eta uraren kalitatean, habitaten leheneratzean eta ibaien konektibitatean hobekuntzak egin diren. Horrek agerian uzten du aplikatutako neurrien eraginkortasuna zehaztasun handiagoz ebaluatzeko beharra.

Kudeaketa Planaren ondorengo ebaluazioa 2027ko ekainean egitea aurreikusita dagoenez, INDAGAk eskuragarri dagoen oinarri zientifiko-teknikoa indartuko du. Horretarako, arrantza elektrikoei, migraziorako oztopoei eta ibai-sarearen ezaugarriei buruzko informazioa eguneratuko du, eta diagnostikorako eta ebaluaziorako tresna berriak garatuko ditu.

AZTIk aingira europarraren azterketan duen esperientzia eta espezie horri buruzko ICESen lantaldean (WGEEL) duen parte-hartze aktiboa jarriko ditu proiektuaren zerbitzura.

Helburuak

INDAGAren helburua da EAEn Aingira Kudeatzeko Plana berrikusi eta eguneratzeko behar den oinarri zientifiko-teknikoa sortzea, aplikatutako neurrien eraginkortasuna ebaluatuz eta espeziearen berreskurapena mugatzen ari diren faktoreak identifikatuz.

Horretarako, proiektuak honako hauek planteatzen ditu:

• 1982tik 2026ra bitartean eskuragarri dagoen aingiraren arrantza elektrikoei buruzko informazioa datu-base bakar batean integratzea eta harmonizatzea.
• Espezieak EAEko ibai-sarean gaur egun duen banaketa karakterizatzea, migraziorako oztopoei buruzko informazioa ere kontuan hartuta.
• Ibai-tarte bakoitzean aingiraren ugaritasuna zenbatesteko espazio esplizituko eredua garatzea.
• 2008tik 2023ra aplikatutako kudeaketa-neurrien ezarpen-maila eta eraginkortasuna ebaluatzea.
• Jarduketen eraginkortasuna modu objektiboan neurtzeko SMART adierazleak diseinatzea.
• 2027ko Planaren ondorengo ebaluazioari begira, indarrean dauden neurriak egokitzea edo kudeaketa-neurri berriak proposatzea.

Espero den inpaktua

INDAGAk Eusko Jaurlaritzaren eskura jarriko du EAEn aingiraren jarraipena eta ebaluazioa egiteko tresna kuantitatibo, espazio esplizitu eta erreproduzigarri bat, datu-base historiko harmonizatu eta eguneratu batean oinarritua.

Espazio-ereduari eta SMART adierazleen sistemari esker, ebidentzian oinarritutako kudeaketa moldagarrirantz aurrera egin ahal izango da, eta neurriak aldian-aldian berrikustea erraztuko da, lortutako emaitzen arabera.

Gainera, proiektuak aingira europarra berreskuratzeko baliabideak modu eraginkorragoan bideratzen lagunduko du, eta oinarri tekniko sendoa eskainiko du 2027ko ekainean egitea aurreikusita dagoen Kudeaketa Planaren ondorengo ebaluaziorako eta eguneratzerako.

Finantzaketa