DigiWaves

Testuingurua

Europako arrantzaren eraldaketa digitala funtsezkoa da kudeaketa, jarraipen, kontrol eta zaintza eraginkorragoak, gardenagoak eta jasangarriagoak lortzeko. Hala ere, artisau-arrantzak, urrutiko arrantzak eta aisialdiko arrantzak zailtasunak dituzte oraindik tresna digitalak eskuratzeko eta datuak bildu eta integratzeko.

Erronka horiei erantzuteko, DigiWaves proiektuak irtenbide digitalak eta Europako arrantza-datuen ekosistema elkarreragingarri bat garatuko ditu, arrantzaleak, administrazioak, kontrol-agintaritzak, komunitate zientifikoa eta teknologia-hornitzaileak elkarren artean konektatzeko.

Helburuak

• Ikuspegi berriak garatzea, egungo datu-bilketako programak hobetzeko, jarraipen-datuen prozesamendua optimizatzeko eta jarraipen-, kontrol- eta zaintza-jardueren (MCS) kostu orokorrak murrizteko.
• Artisau-arrantzaren, urrutiko arrantzaren eta aisialdiko arrantzaren digitalizazio-maila ebaluatzea eta hobetzea.
• Datuen arloko estandarrak, gobernantza-esparruak eta harrapaketak automatikoki erregistratzeko teknologiekin lotutako proiektuak estandarizatzea eta harmonizatzea.
• Datu-azpiegitura segurua, eskalagarria eta elkarreragingarria garatzea, arrantza-jardueratik datozen datuak denbora errealean eta modu eraginkorrean bildu, integratu eta aztertzeko.

Emaitzak

DigiWaves proiektuak 13 teknologia digital garatu nahi ditu, lau arlotan multzokatuta, arrantza-jardueren jarraipena, jakinarazpen elektronikoa, ontzien jarraipena eta datu-bilketa hobetzeko.

1. Ontziko monitorizazio elektronikoa: ontzian instalatutako kamerak eta adimen artifizialeko sistemak, harrapaketak ontzira igo ahala erregistratu eta sailkatzeko.
2. Ontzien monitorizazioa eta jarraipena: ontziak non dauden eta noiz ari diren arrantzan jakiteko sistemak.
3. Harrapaketen erregistroa eta datu-bilketa: arrantzale profesionalek eta aisialdiko arrantzaleek harrapaketak modu erraz eta fidagarrian erregistratzeko tresnak.
4. 3Dko datu sintetikoak sortzeko sistema: adimen artifizialeko sistemak entrenatzeko irudiak sortzen dituen zeharkako azpiegitura, eskuz etiketatutako milaka argazki izateko beharra saihestuz.

Azterketa-kasuak

DigiWaves proiektuak hiru arrantza-eremutan baliozkotuko ditu teknologiak, bakoitzaren digitalizazio-beharrak eta -erronkak kontuan hartuta: artisau-arrantzan, urrutiko arrantzan eta aisialdiko arrantzan.

• Artisau-arrantza (SSF). Proiektuak monitorizazio elektronikoko sistema trinkoak, ontzien jarraipenerako sistemak eta harrapaketak erregistratzeko tresnak probatuko ditu Europako hainbat eskualdetako eta Réunion uharteko arrantza-ontzi txikietan.
• Urrutiko arrantza (LDF). DigiWaves proiektuak urruneko monitorizazio elektronikoko sistemak eta ia denbora errealeko jarraipen-sistemak ebaluatuko ditu Indiako Ozeanoko atunontzi ingurasaredunetan eta Malvinetako uharteetako ontzietan.
• Aisialdiko arrantza (RF). Proiektuak adimen artifiziala erabiltzen duten mugikorretarako aplikazioak probatuko ditu, argazkien bidez arrain-espezieak identifikatzeko eta arrainen tamaina kalkulatzeko. Horrela, arrain-populazioen ebaluazioetan erabili ahal izango diren datuak sortuko dira.

AZTIren rol-a

AZTIk azterketa-kasuak koordinatzeko eta garatutako teknologiak benetako baldintzetan baliozkotzeko lan-paketea gidatzen du. Lan horren barruan, datuak bildu eta baliozkotzen ditu, eta garatutako irtenbideak ebaluatzen ditu, haiek hobetzen laguntzeko. Esparru horretan, AZTIk artisau-arrantzan eta urrutiko arrantzan (atunontzi tropikalak) oinarritutako bi azterketa-kasu garatzen ditu, eta aisialdiko arrantzarekin lotutako azterketa-kasuetan ere parte hartzen du.

Horrez gain, AZTIk harrapaketak automatikoki identifikatzeko ereduen garapena gidatzen du, eta datuak prozesatzeko azpiegitura bat sortzen parte hartzen du. Azpiegitura horri esker, eredu horiek ia denbora errealean erabili ahal izango dira artisau-arrantzan eta urrutiko arrantzan.

Espero den inpaktua

DigiWaves proiektuak arrantza-kudeaketa eraginkorragoa, gardenagoa eta datuetan oinarritua sustatuko du, artisau-arrantzatik, urrutiko arrantzatik eta aisialdiko arrantzatik datorren informazioaren bilketa, integrazioa eta analisia hobetuz. Teknologia horiek benetako inguruneetan baliozkotzeak aukera emango du jarraipen-, kontrol- eta zaintza-sistema elkarreragingarriagoak garatzeko, eta datu osoagoak eta fidagarriagoak erabiltzea erraztuko du arrantza-baliabideen kudeaketan eta ebaluazioan.

Web orria

https://digiwaves.eu/

Parte hartzaileak

Eigen Vermogen van het Instituut voor Landbouw- en Visserijonderzoek – EV ILVO (Belgium); Danmarks Tekniske Universitet – DTU (Denmark); Stichting Wageningen Research – WR (Netherlands); Reframe.food astiki mi kerdoskopiki etairia – RFF (Greece); SINTEF Ocean AS – SO (Norway); Centro de Investigación Marina y Alimentaria AZTI – AZTI (Spain); SCiO IKE – SCiO (Greece); Norwegian Directorate of Fisheries – NDF (Norway); Hellenic Centre for Marine Research – HCMR (Greece); ARMEMENT ENEZ DU – ENEZ (La Réunion); Zunibal SL – ZUN (Spain); Sinay – SINAY (France); Anchor Lab – ANCHOR (Denmark); University of St. Andrews – USTAN (Scotland); Centre for Environment, Fisheries and Aquaculture Science – CEFAS (England); Electronic Fish Information Centre Europe B.V. – EFICE (Netherlands); Collecte Localisation Satellites – CLS (France); World Wildlife Fund, Mediterranean – WWF MED (Italy – International); WWF European Policy Programme – WWF EPO (Belgium); World Wide Fund for Nature Greece – WWF GR (Greece); ADIGO Mechatronics – ADIGO (Norway); Danmarks fiskeriforening producers organisation – DFPO (Denmark)

Finantzaketa