SOSTE

Testuingurua

Jasangarritasuna ardatz estrategikoa da arrantza-sektorearen etorkizunerako, araudiaren eta merkatuaren eskakizun berriek eta jardueraren ingurumen-inpaktua murrizteko beharrak markatutako testuinguru batean.

Ikerketak eta berrikuntzak arrantza jasangarriago baterantz aurrera egiteko irtenbideak eskaintzen dituzte, bereziki harrapaketa osagarriak eta itsas zaborrak murrizteko eta klima-aldaketari aurre egiteko. Hala ere, aurrerapen horiek benetako eragina izan dezaten, ezinbestekoa da itsasontzietako eguneroko jardunean txertatzea erraztea.

Erronka horri erantzuteko, SOSTEk ezagutzaren transferentzia zuzena indartzen du komunitate zientifikoaren, prestakuntza-erakundeen eta arrantza-sektorearen artean. Bermeoko, Ondarroako eta Pasaiako itsas eta arrantza-eskolak funtsezkoak izango dira azken aurrerapen zientifiko eta teknologikoak sektoreko profesionalei eta etorkizuneko belaunaldiei helarazteko.

Helburuak

SOSTEren helburua da ezagutza zientifikoa eta I+G+Bko emaitzak transferitzea, arrantza-ontzietan jardunbide eraginkorragoak, seguruagoak eta jasangarriagoak ezartzea sustatzeko.

Proiektuak hiru lan-ildo nagusi ditu:

1. Harrapaketa osagarriak: helburu ez diren espezieen harrapaketak prebenitzeko eta espezie kalteberak modu seguruan askatzeko teknikak ezagutaraztea.
2. Itsas zaborrak: hondakinen sorrera murrizteko eta material jasangarriagoekin egindako arrantza-aparailuen erabilera sustatzeko irtenbideak zabaltzea. Era berean, itsas zaborrak biltzeko eta behar bezala kudeatzeko ekimenak bultzatzea.
3. Klima-aldaketa: arrantza-jarduerako energia-kontsumoari, efizientziari eta trantsizio energetikorako aukerei buruzko ezagutza txertatzea.

Horretarako, AZTIk eskuragarri dauden berrikuntzak eta jardunbide egokiak aztertuko ditu, eguneratu daitezkeen prestakuntza-materialak garatuko ditu eta tailer parte-hartzaileak eta baterako sorkuntza-prozesuak antolatuko ditu, arrantzako, makinetako eta urpekaritza profesionaleko espezialitateetako ikasle eta profesionalei zuzenduta.

Emaitzak

SOSTEk arrantzaren jasangarritasunari buruzko esparru zientifiko-tekniko eguneratua sortuko du, baita ikerketaren emaitzetan, berrikuntza teknologikoetan eta arrantza-flotarekin batera garatutako esperientzietan oinarritutako prestakuntza-materialak ere.

2026an eta 2027an, AZTIko ikertzaileek tailerrak egingo dituzte Bermeoko, Ondarroako eta Pasaiako itsas eta arrantza-eskoletan. Parte-hartzean oinarritutako jardueren bidez, ezagutza zientifikoa arrantza-aparailu eta -teknika desberdinetara eta profesionalen laneko errealitatera egokituko da.

Gainera, proiektuak jarduera horietan jasotako esperientziak aztertuko ditu, jardunbide egokiak, ikasitakoak eta hobetzeko aukerak identifikatzeko. Horretarako, berrikuntza zientifikoa eta teknologikoa sektorera transferitzeko erabilitako metodologien eraginkortasuna ebaluatuko du.

Espero den inpaktua

SOSTEk zientzia eta berrikuntza arrantzaren eguneroko jardunera modu egituratuan hurbiltzen lagunduko du, egungo eta etorkizuneko profesionalek tresna eta irtenbide berriak beren lanean txerta ditzaten.

Ezagutzaren transferentzia horrek helburu ez diren espezieen harrapaketak eta itsas zaborrak murrizten eta klima-aldaketari aurre egiten lagun dezake. Halaber, sektoreak aurrerapen zientifiko eta teknologikoetara eta jasangarritasunaren arloko eskakizun berrietara egokitzeko duen gaitasuna hobetu dezake.

Gainera, AZTIren, itsas eta arrantza-eskolen eta sektorearen arteko lankidetzari esker, ebidentzia zientifikoan eta esperientzia praktikoan oinarritutako ezagutza-transferentziako eta baterako sorkuntzako eredua sendotu ahal izango da. Eredu hori etorkizuneko berrikuntza- eta prestakuntza-ekimenetan aplikatu ahal izango da, ingurumenaren, gizartearen eta ekonomiaren ikuspegitik jasangarria den arrantza sustatzeko.

Finantzaketa