Albisteak
Lezama, 2022ko azaroan 17a. Athletic Club, bere Berrikuntza arloaren bitartez, eta AZTI zentro zientifiko eta teknologikoa elikaduraren bidez kirol-errendimendua hobetzeko elkarlanean daude.
Lezaman entrenatzen duten jokalarien kirol-errendimendu handiena bultzatzeko asmoz, Athletic Clubek eta AZTI zentro zientifiko eta teknologikoak urtebete daramate ikertzen eta diseinatzen kirola hobetzen lagunduko duten nutrizio-soluzioak neurrira egiteko.
AZTIrekin egindako lankidetza hau Berrikuntza arlo zuri-gorriko proiektuen ildo nagusietako baten barruan kokatzen da: elikaduraren analisia eta ikerketa, jokalariaren hobekuntza integralari aplikatzeko. Honen harira, Athletic Clubek nutrizio adimenduneko sistema aitzindaria jarri zuen martxan duela gutxi: Smart Nutrition Lab. Laborategi gastronomiko bat da, eta osasunean eta ongizatean egindako azken aurrerapenak barne hartzen ditu kirol-errendimendu profesionalari aplikatzeko, eta honen barruan AZTI funtsezkoa da. AZTI, besteak beste, elikaduraren eta osasunaren azterketan espezializatuta dago, eta elikagaiek jokalariengan duten eragina ikertzen ari da, haien hobekuntza integrala sustatzeko aukera emango duten eredu prediktiboak egiteko, lesio-arriskuaren ebaluazioa eta errekuperazio-denboren laburtzea barne.
AZTI adimen artifizialean eta Big Datan oinarritzen da analisiak egiteko, baita bioteknologia aurreratuenetan eta zientzia omikoetan ere (zehazki, mintzaren lipidomikan eta mikrobiotan). Teknologia horiek Athletic Clubeko lehen taldeetako jokalariengan aplikatzen ari den doitasunezko elikadura ahalbidetzen dute, eta Klubeko jangela adimentsuan integratzen dira. Bertan, neurrira egindako elikadura-gomendioak sortzen ari dira jokalari bakoitzarentzat, bai elikagaiei dagokienez, bai gehigarriei dagokienez.
Hasiera batean Athletic Clubeko lehen taldeekin ari dira lanean, baina bigarren fase batean Lezamako gainerako taldeetara zabalduko da.