Albisteak
Sukarrieta, 2026ko urriaren 13a. AZTI Basque Artificial Intelligence Center (BAIC) erakundeko bazkide egin da. Pausu horrekin, adimen artifiziala garatzeko eta Euskadirentzat estrategikoak diren arloetan aplikatzeko konpromisoa indartu du, besteak beste, ekonomia urdinean, elikadura-sistemen jasangarritasunean, osasunean eta klima-aldaketara egokitzeko prozesuetan.
BAIC lankidetza publiko-pribatuko elkarte bat da, Euskadin adimen artifizialaren erabilera bizkortzea eta lurraldea arlo horretan nazioarteko erreferente bihurtzea helburu duena. Horretarako, enpresen, ikerketa-zentroen, erakundeen eta eragile teknologikoen arteko lankidetza sustatzen du.
AZTI ekosistema horretan sartzea beste urrats bat da ikerketa- eta berrikuntza-ibilbide luze batean, non datuek, modelizazio aurreratuak eta adimen artifizialak gero eta garrantzi handiagoa duten. AZTIk hainbat arlotan erabiltzen ditu teknologia horiek: ozeanoaren egoera monitorizatzeko eta aurreikusteko, elikagai-industriarako sistema adimendunak garatzeko, arrantza jasangarria sustatzeko, nutrizio pertsonalizatua lantzeko eta ingurumen-ebaluazioak egiteko, besteak beste.
BAICen parte hartuta, AZTIk adimen artifizialean oinarritutako irtenbideak garatzen lagunduko du, gizartearen erronka nagusietako batzuei erantzuteko: itsas baliabideen jasangarritasuna, trantsizio ekologikoa, elikadura-katearen eraldaketa digitala, pertsonen osasuna eta enpresen lehiakortasuna hobetzea.
«Adimen artifiziala funtsezko teknologia da, eta ahalmen handia du ezagutza sortzeko, datu konplexuak interpretatzeko eta erabakiak hartzen laguntzeko modua eraldatzeko. BAICeko kide izateak aukera emango digu Euskadiko ekosistemako beste eragile batzuekin lankidetzan aritzeko eta gaitasun horiek gizartera eta ekoizpen-sarera azkarrago transferitzeko», nabarmendu du Teresa Pérezek, AZTIko Eraldaketa Digitaleko eta Sistemetako zuzendariak.
Gaur egun, AZTI adimen artifizialeko tresnak garatzen eta aplikatzen ari da hainbat arlotan, hala nola ingurumenaren monitorizaziorako ikusmen artifizialean, arrantza-kudeaketarako eta klima-aldaketara egokitzeko eredu prediktiboetan, elikagai-industriaren digitalizazioan, doitasunezko nutrizioan eta ozeanoa behatzeko sistemetatik datozen datu-bolumen handien analisi aurreratuan.
BAICekin bat eginda, AZTIk datuetan oinarritutako berrikuntzaren eta Euskadiko adimen artifizialaren ekosistemarekiko lankidetzaren aldeko apustua indartu du. Horrela, ezagutza sortzeko eta teknologia garatzeko aukera berriak sustatzen lagunduko du, baita Euskadin eragin ekonomiko eta sozial positiboa sortzen ere.