Albisteak
Edukien aurkibidea
Atzo arratsaldean, ekainak 18, AZTIk Bai Euskarari 2025 Saria jaso zuen Donostiako San Telmo Museoan egindako ekitaldian. Sariak AZTIk euskararen normalizazioan egindako lan isila aitortzen du, komunitate sendo baten parte garela berretsiz. Euskararen alde AZTIn dihardugun askoren lana gogora ekarri zen: Euskara Taldeko kideena (izatez, Leire Citoresek eta Miren Altunak jaso zuten saria), laster hogei urte beteko dituen Kuxkuxean barne-aldizkariarena, eta, batez ere, Nerea Goikoetxearen inplikazioa nabarmendu zen.
Saria ez dugu helmuga gisa hartzen, baizik eta bultzada gisa: izan ere, euskara plana berreskuratzen ari gara.
Zientziaren arloan ingelesaren nagusitasunaren ondoan, euskarak leku duina izatea izango da gure erronka handienetako bat. Hizkuntza ez dugu oztopo gisa ikusten, baizik eta balio erantsi koherente gisa; helburu globalak tokiko hizkuntzan eraikitzea egokiena delako. Era berean, generoaren eta hizkuntzaren gurutzagunean emakumeek egiten duten lan ikusezina agerian jartzeko konpromisoa hartu dugu.
Grupo Gismak eta Egarri Edariak erakundeekin batera jasotako aitortzak erakusten du edozein erakundek egin dezakeela euskararen alde. Pello Reparazek Bai Euskarari Lagunaren bidez jasotako sorkuntza-aitorpenak urrats horren oihartzuna areagotu du. Guztion ahaleginari esker, euskaraz lan egiteko, kontsumitzeko eta bizitzeko aukerak zabaldu dira; horregatik, AZTIko langile bakoitzaren ekarpena ospatzekoa da.
Azkenik, eskerrik beroenak Bai Euskarari Elkarteari –egindako lanagatik eta erakutsitako konfiantzagatik–, eta euskarari egunero arnasa ematen dioten lankide guztiei. Sari honek erakusten digu norabide egokian goazela; beraz, elkarrekin aurrera jarraituko dugu, harro eta konpromisoz, euskarak gure proiektu zientifiko-teknikoetan eta eguneroko jardunean gero eta presentzia handiagoa izan dezan.
Bai Euskarari Elkartea Bai Euskarari Ziurtagiria kudeatzeko sortu zen 2007an. Ziurtagiria da Bai Euskarari Elkartearen (lehen, Bai Euskarari Ziurtagiriaren Elkartea) proiektu nagusia eta, horrez gain, arlo sozioekonomikoan euskararen erabilera areagotzera bideraturiko hainbat proiektu dituzte martxan. Bai Euskarari Elkartearen elementu bereizgarriena Bai Euskarari Ziurtagiria da. Bai Euskarari Elkartearen xedea da alor sozioekonomikoaren espazioak euskaraz betetzeko eragitea, komunitatea sustatuz eta tresna, baliabide zein proiektu berritzaileak eraikiz eta partekatuz.