ADINBERRI Longevity Forum nazioarteko topagunea da, bizitza-luzerak dakartzan erronkei eta aukerei buruzkoa. Enpresak, erakundeak, profesionalak eta ikerketa- eta berrikuntza-eragileak biltzen ditu, zahartze osasungarriago baterantz eta bizi-kalitate hobe baterantz aurrera egiteko.
2026ko edizioa urriaren 14an eta 15ean egingo da Donostiako Kursaal Biltzar Jauregian, eta hainbat jarduera uztartuko ditu: estatuko eta nazioarteko adituen parte-hartzea izango duen kongresua, erakusketa-gunea, erakustaldi-tailerrak, irtenbideak esperimentatzeko Living Lab bat eta bilera profesionalak.
AZTIk topaketan parte hartuko du, zahartze osasungarrirako zientzian eta teknologian dituen gaitasunak aurkeztuz, elkarren osagarri diren bi lan-eremutan: doitasuneko nutrizioa eta adineko pertsonen beharretara egokitutako elikagaien garapena.
Doitasuneko nutrizioaren arloan, biomarkatzaileen eta mikrobiotaren azterketak, adimen artifizialarekin eta baliozkotze zientifikoarekin batera, elikadura pertsonalizatuago baterantz aurrera egiteko zer aukera eskaintzen dituen erakutsiko du. Elikadura-berrikuntzaren arloan, berriz, proteina ugariko elikagaiak, irensteko zailtasunak —disfagia— dituzten pertsonentzako irtenbideak eta osagai funtzionalak diseinatzeko dituen gaitasunak aurkeztuko ditu, optimizazio sentsoriala eta kontsumitzaileekin egindako baliozkotzea ere txertatuta.
Topaketa enpresei, osasunaren eta zaintzaren arloko profesionalei, administrazioei, ikerketa-zentroei eta zahartzearen eta bizitza-luzeraren inguruan irtenbideak garatzeko eta lankidetzak sortzeko interesa duten gainerako eragileei zuzenduta dago.
Informazioa eta izen-emateak, ekitaldiaren webgunean.