Itsasoan zenbat arrain dauden kalkulatzea da oraindik ere arrantza-ebaluazioaren erronka nagusietako bat. Antxoa bezalako espezieetan, zailtasuna areagotu egiten da espezieak espazioan eta denboran duen aldakortasun handiagatik. Akustika eta arrantza pelagikoak konbinatzea erreferentziazko metodoa bada ere, metodo inbaditzailea da, eta harrapaketek ez dute beti hautemandako guztia baliozkotzen: sareak ez dira sakonera jakin batzuetara iristen, eta arrain batzuek saihestu egiten dituzte. Horrek uretan benetan dagoena behar bezala karakterizatzeko gaitasuna mugatu dezake, eta gero eta interes handiagoa dago laginketa optimizatu eta kanpainen inpaktua murrizteko metodo osagarriak erabiltzeko.
AZTIk urteak daramatza ingurumen-DNA (eDNA) aztertzen, ozeanoa modu ez-inbaditzailean behatzeko tresna gisa. Orain, funtsezko urratsa ez da metodoak funtzionatzen duela frogatzea, baizik eta arrantza-ebaluazioan modu zorrotzean integratzea.
Testuinguru horretan, AZTIk zehaztu du nola konbinatu datu akustikoak eta eDNAren datuak Bizkaiko golkoko antxoa europarraren biomasa zenbatesteko. Lana ICES Journal of Marine Science aldizkarian argitaratu da. Azterketa JUVENA kanpainako sei urteko datuetan (2018–2023) oinarritzen da: transekto akustikoak eta PCR digitalaren bidez aztertutako ur-laginak erabili dira; teknika horrek litro bakoitzeko DNA-kopia kopurua kuantifikatzen du.
Bi informazio-iturriak uztartzeko, eredu bayestar bateratu bat garatu zen. Eredu horrek seinale desberdinak eta haiei lotutako ziurgabetasuna integratzen ditu, eta azpian dagoen aldagai komun gisa benetako biomasa hartzen du.
Zenbatespen bateratuak bat etorri ziren aurretik zegoen ezagutzarekin —kontzentrazio handiagoa plataforma kontinentalaren eremuan—, eta eDNAren analisiak banaketa zertxobait zabalagoa iradoki zuen. Horrek espeziea hautemateko gaitasuna indartzen du eta indize akustikoetarako kalitate-kontroleko elementu osagarri bat eskaintzen du. Ikuspegi horrek ziurgabetasuna murrizten eta espeziearen presentzia faltsuki ez hautemateko kasuak identifikatzen lagun dezake, stockaren banaketa espazialaren interpretazioa hobetuz.
Lana kontzeptu-proba gisa planteatu da: eDNAren laginketa ez da beti modu erregularrean egiten, eta kasu honetan hainbat urtetako datuak bateratu behar izan ziren; horrek urte arteko analisia mugatzen du. Integrazio operatiboago baterantz aurrera egiteko, 2024az geroztik JUVENAko eDNA-laginketa estazio hidrografiko finkoekin lerrokatzen ari da. Horrek urtez urteko ebaluazio zehatzagoak eta eraginkorragoak egiteko aukera zabaltzen du.
Sektoreak: Arrantza eta akuikulturako sektorea
Ikerketa lerroak: Arrantza eta akuikultura eraginkorra eta jasangarria
Ikerketa-azpilerroak: Arrantzaren kudeaketa jasangarria