Albisteak
Edukien aurkibidea
Pasaia, 2026ko uztailak 29. Bizkaiko golkoko antxoa-populazioa egoera onean dago, BIOMAN 2026 kanpaina zientifikoaren behin-behineko emaitzen arabera.
AZTIk joan den maiatzean egin zuen kanpainaren arabera, antxoaren biomasa 155.000 tonakoa da behin-behinean, espeziearentzat ezarritako 26.600 tonako segurtasun biologikoko mugatik gora. Adierazle horrek maiatzean Bizkaiko golkoan gutxi gorabehera dagoen antxoa-kantitatea adierazten du, pisutan, eta populazioaren egoera ebaluatzeko erreferentzia nagusietako bat da.
BIOMAN 2026ren emaitza aipagarrienetako bat antxoa gazteen proportzio handia da. Adin-egituraren azterketaren arabera, aztertutako aleen % 74 urtebetekoak dira, serie historikoarekin alderatuta ehuneko handia. Bi urteko antxoak laginaren % 21 dira, eta hiru urtekoak, % 5.
Populazioan arrain gazteen proportzio handia egoteari erreklutamendu handia esaten zaio. Bereziki garrantzitsua da antxoa bezalako bizi-ziklo laburreko espezieetan, populazioa berritzen eta egonkor mantentzen laguntzen baitu.
BIOMAN Bizkaiko golkoko antxoa-populazioaren egoera ezagutzeko kanpaina zientifiko nagusietako bat da. Halaber, arrantza-aukerak ezartzeko oinarri den aholkularitza zientifikoa osatzeko informazioa ematen du.
Kanpainaren ondoren, Arrautzen Eguneko Ekoizpenen Metodoa aplikatzen da. Nazioartean erreferentziazkoa den teknika horrek antxoaren biomasa zenbatesteko aukera ematen du, itsasoan dauden arrautzak eta populazioaren ugalkortasuna kontuan hartuta. Modu errazean azalduta, ugalketa-garaian zenbat antxoa heldu dauden kalkulatzeko balio du, itsasoan aurkitutako arrautzen kopurua eta antxoa bakoitzak sortzen duen arrautza-kopurua oinarri hartuta.
Itsasoaren Nazioarteko Esplorazio Kontseiluak (ICES) 119.768 tonako biomasa zenbatetsi zuen 2025erako, 26.600 tonako biomasa-mugatik gora. Zenbatespena egiteko, 2025eko BIOMAN kanpainako datuak, maiatzeko Frantziako PELGAS kanpainakoak, AZTIk udazkenean egindako JUVENA gazteen zenbatespen-kanpainakoak eta 2025eko flotaren harrapaketei buruzko informazioa hartu ziren oinarri.
2026rako, Harrapatze Baimenduen Gehienezko Kopurua (TAC) 33.000 tonatan ezarri zen Espainiako eta Frantziako flotentzat, Kontseiluaren 2026ko urtarrilaren 26ko 2026/249 (EB) Erregelamenduarekin bat etorriz.
2026ko biomasaren behin betiko zenbatespena azaroan lortuko da, BIOMAN, PELGAS eta JUVENA kanpainetako datuak eta flotaren harrapaketei buruzko informazioa batera aztertuta, ICESen antxoa, sardina eta txitxarroari buruzko lantaldearen esparruan.
“BIOMAN kanpainaren atariko emaitzak oso berri onak dira, eta, udazkeneko JUVENA kanpainak aurreikuspen horiek berresten baditu, gure arrantzaleek datorren urtean azken urteetakoaren antzeko arrantza-kuota izango dutela adierazten dute”, adierazi du Amaia Barredo sailburuak.
Hiru hamarkadatik gora kanpaina ozeanografikoen eta arrantza-kanpainen bidez bildutako datu-serieei esker, hobeto ezagutu ahal izan da antxoaren bilakaera, populazioan izandako aldaketak hauteman dira eta kudeaketa-neurriak baliabidearen egoerara egokitu ahal izan dira.
Jarraipen hori bereziki garrantzitsua da bizi-ziklo laburra eta berezko aldakortasun handia duen espezie batean. Informazio zientifikoari esker, administrazioek, arrantza-sektoreak eta ikerketa-komunitateak datu objektiboak dituzte arrantza-jarduera eta Kantauri itsasoko baliabide nagusietako baten kontserbazioa uztartzeko.
Gainera, BIOMAN kanpainak ikuspegi ekosistemikoa du 2016az geroztik, eta jarraipen zientifikoa itsas ekosistemen jasangarritasun- eta kontserbazio-irizpideekin uztartzen du.
AZTIk egin du BIOMAN 2026 kanpaina, Oinarrizko Datuen Programa Nazionalaren (PNDB) 2022–2027 esparruan. Programa horrek arrantza-sektoreko datuak biltzeko, kudeatzeko eta erabiltzeko Europako esparrua betetzen du, eta Arrantza Politika Erkiderako aholkularitza zientifikoa babesten du.
Kanpainak Europar Batasunaren, Eusko Jaurlaritzako Arrantza Zuzendaritzaren eta Nekazaritza, Arrantza eta Elikadura Ministerioko Arrantzako Idazkaritza Nagusiaren finantzaketa jaso du. Azken horrek, gainera, Emma Bardán eta Vizconde de Eza ontzi ozeanografikoak erabiltzeko aukera eman du.
Babes horri esker, jarraipena eman ahal izan zaio Europako antxoaren jarraipen zientifikoko datu-serie luzeenetako bati.