ZIMARROI

Testuingurua

Hegaluze gorria bezalako espezie oso migratzaileetan, klima-aldaketari lotutako espazio-denborazko banaketaren aldaketek Bizkaiko Golkoko euskal arrantzen bideragarritasunean eragin dezakete, baita baliabidearen eskuragarritasunean ere. Aldaketa espazial horiek, halaber, Harrapaketa Onargarri Osoen (TAC) eta herrialdeen arteko kuoten banaketarako irizpideetan ere eragina izan dezakete.

Testuinguru honetan, “zonako atxikimendua” (zonal attachment) kontzeptua kuotak banatzeko irizpide posible gisa hartzen ari dira arrantza-antolamendurako eskualde-erakundeetan. Ipar Atlantikoko zenbait herrialdek, hegaluze gorriaren kuota murriztuak izanik, marka elektronikoen ikerketak sustatu dituzte, espezie honek haien uretan egiten duen erabilera errepikakorra agerian uzteko, etorkizunean kuoten banaketaren berrikuspen posibleen esparruan argudio gisa.

Egoera honetan, beharrezkoa da hegaluze gorriaren espazio-denborazko banaketari eta Bizkaiko Golkoarekiko duen leialtasunari buruzko ezagutza hobetzea, baliabidearen kudeaketa sendoago eta moldakorrago baterantz lagunduko duen informazio zientifiko sendoa emateko, bai tokiko bai nazioarteko eskalan.

Helburuak

Proiektuaren helburu orokorra Bizkaiko Golkoak hegaluze gorriaren bizi-zikloan duen eginkizuna zehaztea da, adin-talde desberdinetarako eta urteko urtaro guztietan zehar, ikuspegi multidiziplinar baten bidez.

Helburu espezifikoak hauek dira:

• Bizkaiko Golkoan hegaluze gorriaren espazio-denborazko banaketari buruzko ezagutza hobetzea teknologia aurreratuak erabiliz; besteak beste, marka elektronikoa, analisi genetikoak, otolitoetako analisi kimikoak eta Kantauri itsasoko uretan larben prospekzioa.
• Zehaztea Bizkaiko Golkoak Atlantikoan hegaluze gorriaren elikadura-eremu nagusia izaten jarraitzen duen ala ez, eta beste elikadura-eremu batzuekin alderatuta duen garrantzi erlatiboa kuantifikatzea.
• Hegaluze gorriak Bizkaiko Golkoarekiko duen leialtasun-maila ebaluatzea, bai urte barruko eskalan bai urte arteko migrazio jarraituetan.
• Azken hamarkadetan hegaluze gorriaren habitat hobetsiko banaketan izan daitezkeen aldaketak aztertzea, eta horrek arrantza-arte desberdinekin duen elkarrekintzan duen eragina ebaluatzea.
• Bizkaiko Golkoan dagoen hegaluze gorriaren jatorri populazionala argitzea, gehienbat Mediterraneotik datorren ala Mexikoko Golkoko aleak ere badauden zehaztuz.
• Bizkaiko Golkoak hegaluze gorrarentzat ugalketa-eremu berri gisa izan dezakeen funtzioa ebaluatzea.

Espero den inpaktua

Espezie oso migratzaileen —hala nola hegaluze gorria— espazio-denborazko banaketari buruzko ezagutza zehatza funtsezkoa da arrantzen kudeaketa eraginkor eta moldakorrerako, bai xede-espezieen kasuan bai lotutako beste arrantza batzuetan ere, hala nola pelagiko txikien arrantzan.

Gaur egungo testuinguruan, hegaluze gorriaren kuota txikia edo batere ez duten hainbat herrialde beren uretan espeziearen presentziari buruzko ebidentzia zientifikoa sortzen ari direnez, proiektu honen emaitzek informazio estrategikoa emango dute, etorkizunean kuoten banaketari buruzko eztabaidetan garrantzitsua izan daitekeena.

Era berean, Bizkaiko Golkoan dagoen hegaluze gorriaren jatorri populazionalaren jarraipenak aukera emango du egiaztatzeko indarrean dagoen kudeaketa-esparrua egokia izaten jarraitzen duela eta ez dela gertatzen TACaren aplikazioa baldintzatu edo arriskuan jar dezakeen salbuespenezko egoerarik. Azkenik, baliabidearen eskuragarritasun denborazkoa hobeto ulertzeak arrantza- eta gizentze-aldien (granjeo) definizio egokia edo doikuntza erraztuko du, kudeaketa eraginkorrago eta jasangarriago baterantz lagunduz.

Finantzaketa