Albisteak
Maitane Grande eta Jefferson Murua munduko arrantza-antolamenduko eskualde-erakunde nagusietako bitan arrainak kontzentratzeko gailuei (FAD, ingelesezko siglak) buruzko nazioarteko aditu-taldeak gidatzeko izendatu dituzte. Hain zuzen ere, Pazifiko Ekialdeko Atun Tropikalaren Batzordean (CIAT-IATTC) eta Indiako Ozeanoko Atunaren Batzordean (CAOI-IOTC), hurrenez hurren.
Lantalde horiek hainbat herrialdetako adituak biltzen dituzte, atun tropikalaren arrantzan oso erabiliak diren FADen erabilera jasangarriagoa sustatzeko helburuarekin. Haien lana itsas ekosistemetan dituzten ondorioak aztertzea, azken aurrerapen zientifikoak berrikustea eta ingurumen-inpaktua murrizten lagunduko duten irtenbideak sustatzea da.
Maitane Grande eta Jefferson Muruaren izendapenak AZTIk FADen ikerketan eta atun-arrantzen kudeaketa jasangarriari emandako laguntza zientifikoan metatutako esperientzia aitortzen du. Urteak daramatza zentroak gailu horien ezagutza hobetzea eta ebidentzia zientifiko onenean oinarritutako kudeaketa sustatzea helburu duten ikerketa-proiektuetan eta nazioarteko aholkularitza-taldeetan parte hartzen.
Aditu-talde horien bidez, CIATek eta CAOIk atun tropikalaren arrantzen kudeaketa gero eta arduratsuagoa sustatzeko lan egiten dute, jasangarritasun-irizpideak txertatuz eta itsas ekosistemetan izan ditzaketen inpaktuak minimizatuz.
Lantalde horietako presidente berri gisa, AZTIko ikertzaileek funtsezko zeregina izango dute eztabaida zientifikoen koordinazioan, ikerketa-lehentasunen identifikazioan eta atun-arrantzen etorkizuneko jasangarritasunari lagunduko dioten gomendioen prestaketan.