ULYSSES

Helburua

ULYSSES proiektuaren helburua euskal kostaldearen eta ozeanoen osasuna hobetzea da, ibai eta itsas inguruneei buruzko ezagutza sortuz eta haienganako sentsibilizazioa handituz.

Ekimen honek sakondu egingo du Euskal Autonomia Erkidegoko ibaietan, trantsizio-uretan eta Bizkaiko golkoan hondakinen garraioa eta pilaketa/sakabanaketa baldintzatzen dituzten prozesu fisikoen ezagutzan. Helburu horrekin, honako alderdi hauek aztertuko dira:

• Euskal lurraldeko ibaiertzetako zaborren ekarpena, eta lur jatorriko zabor horiek kostalde hurbileko zein urruneko guneetara eta itsaso zabalera nola garraiatzen diren.
• Bizkaiko golkoko kostaldeko eta itsaso zabaleko eremu frontalak: haien ezaugarriak eta dinamika, baita zaborrak (makroplastikoak eta mikroplastikoak) metatzeko, garraiatzeko eta sakonera handiagoetara eramateko duten gaitasuna ere.
• Euskal kostaldeko itsas zaborren jatorria, hondakin motak, jatorri probableenak eta pilaketa handieneko guneak.
• Itsas zaborren eta bizidunen arteko elkarrekintzak pilaketa handiko eremuetan, bai eremu frontaletan bai bereziki kalteberak diren kostaldeko guneetan, inpaktuak aurreikusteko eta arintze-neurriak garatzen aurrera egiteko.

Horretarako, zaborra biltzeko jarduerak egingo dira hondartzetan eta ibaietan; tokiko informazioa eta datu ozeano-meteorologiko garrantzitsuak bilduko dira Itsas Zabor Flotatzailearen (BMF) eta Ibaietako Zabor Flotatzailearen (BRF) ibilbidea eta banaketa zehazteko; eta itsas kulturaren ezagutza sustatuko da.

Bost gailu motaren bidez (kamerak, hiru ontzi mota eta bi buia mota barne) eta nazioarteko lankidetza-sare baten parte-hartzearekin, gizateriaren ingurumen-erronka handienetako bati aurre egiten lagundu nahi zaio: itsas zaborrari.

Informazio gehiago hemen: https://ulyssesproject.org/home-eus

Finantzaketa