Albisteak
Edukien aurkibidea
Bilbo, 2024ko uztailaren 15ean- Euskadi arrantza-zientziaren abangoardian finkatu da, Britainiar Uharteetako Nazioarteko Arrantza Elkartearen (FSBI) urteroko Sinposio entzutetsua ospatzeko. Bere historian, elkarte honek Britainia Handitik kanpora ekitaldi hau ospatzen duen lehen aldia da. Uztailaren 15etik 19ra bitartean, Bilboko Bizkaia Aretoan aurkeztuko dira zientzia omikoetako aurrerapen garrantzitsuenak. Zientzia omikoak, genomika eta proteomika bezalako diziplinak biltzen dituen eremua da, izaki bizidunen konplexutasun molekularra ulertzeko funtsezkoak direnak. Arrainak eta bertan bizi diren ekosistemak kudeatzeko eta kontserbatzeko diziplina horien aplikazioan duen enfasi bereziagatik nabarmenduko da ekitaldi hau.
Sinposioak unibertsitateetatik, ikerketa-zentroetatik, gobernu-erakundeetatik, GKEetatik eta 33 herrialde eta 5 kontinentetako enpresetatik etorritako 150 aditu eta lider baino gehiago bilduko ditu. AZTI zentro teknologikoa izango da topaketa global honen anfitrioia. Aurtengo edizioak azpimarratuko du diziplina horiek gero eta garrantzi handiagoa dutela arrantza-ekosistemak eta horien baliabideak kudeatzeko eta kontserbatzeko.
Naiara Rodriguez Ezpeleta, AZTIko Bioteknologia eta Ekologia Molekularraren arloko koordinatzaileak, zientzia omikoen garrantzia azpimarratu du: “Puntako teknologia horiek, orain arte nagusiki ikerketa medikoa irauli dutenak, ekologiaren esferan indar handiz azaleratzen ari dira. Haren aplikazioari esker, uretako ekosistemetan kudeaketa- eta kontserbazio-estrategia zehatzagoak eta eraginkorragoak garatzen ari gara. “
Sinposioak askotariko gaiak jorratuko ditu: kudeaketa-unitateak definitzeko populazioen konektibitate genetikoa aztertzetik hasita, biodibertsitatea monitorizatzeko ingurumen-DNAren erabileraraino. Gainera, ikuspegi multiomikoak aztertuko dira klima-aldaketarekiko egokitzapen ebolutiboak ulertzeko eta espezieen erresilientzia balioesteko. Aurkezten diren aurkikuntzak eta ikuspegiak funtsezkoak izango dira gaur egungo erronkei aurre egiteko eta arrantzaren kontserbazioan bide berriak irekitzeko.
Sinposio honetan aurkeztutako lorpen zientifikoek ikerketaren egungo egoera islatzeaz gain, etorkizuneko aurrerapenetarako oinarria ere ezartzen dute. “Teknologia omikoak bateratzeak bide bat irekitzen du teknika horiek oraindik azaleratzen ari diren herrialdeak gaitzeko, ezagutza demokratizatuz eta nazioarteko lankidetza sustatuz” adierazi du AZTIko adituak.
Arrantza-biologian eta genetikan adituak eta azken erabiltzaileak foro berean biltzea funtsezkoa da ikuspegi asko eta osagarriak kapitalizatzeko. Topaketa honek ideia eta proiektu berriak sor ditzaketen eztabaida aberasgarriak sustatzen ditu, eta, horrela, berrikuntza sustatzen du.
Sinposio honek, prozesu biologiko konplexuak ulertzeko orduan, zientzia omikoek duten garrantzia sendotzen dut. Horretaz gain, XXI. mendeko erronketara egokitutako eta eraginkorragoak diren arrantza kudeatzeko eta kontserbatzeko estrategien diseinuan izan duten funtsezko zeregina ere azpimarratzen du.