Erronka
Ingurune profesionalean, hornidura bakoitzean sartzen den produktu-kopurua aldakorra izan daiteke, eta horrek eragina du egosketa-uniformetasunean; ondorioz, hondakin gehiago sortu eta energia-kontsumoa handitu daiteke. Egoera horri aurre egiteko, Salva Industrialek Flex Baking programa garatu zuen, prozesuko datu errealetan oinarrituta labe-parametroak automatikoki doitzeko gai dena.
AZTI-SALVA arteko kasu honetan, erronka Flex Baking sistema fintzea zen, labeen energia-eraginkortasuna areagotzeko eta tenperatura-puntu gorak saihesteko. Puntu horiek bereziki kritikoak dira egosketa-fasearen amaieran, eta areagotu egiten dira karga txikiagoa denean. Helburua desbideratze termiko horiek zuzentzea eta prozesuaren portaera egonkortzea zen.
Irtenbidea
AZTIk SALVAri lagundu dio Flex Baking programa berrituaren garapen integralean. Horretarako, planteamendu teorikoak eta proba esperimentalak egin dira SALVA labeetan, karga osoarekin egindako egosketa eta Flex Baking moduan egindakoa alderatuz. Saiakuntza bakoitzean, produktuaren eta labe barruko tenperaturak etengabe erregistratu dira; amaieran, ogiaren kalitatea ebaluatu da (testura, kolorea eta ezaugarri sentsorialak).
Kausa-ondorio analisi horri esker, Flex Baking sistemaren barruan komando espezifikoak garatu dira, egosketa-parametroak denbora errealean automatikoki doitzeko. Horretarako, karga osoko erreferentzia-kurba eta une bakoitzean neurtutako labe-tenperatura konbinatzen dira, egosketa-prozesua egokitzeko.
Ikuspegi horrek prozesu egonkorragoa eta energia-eraginkorragoa ahalbidetzen du, karga-baldintzak edozein direla ere produktuaren kalitate optimoa bermatuz.
Emaitzak
Flex Baking programa berriak aire-zirkulazioa eta labe-tenperatura modu dinamikoan doitzen ditu, produktu-kopurua edo tamaina edozein dela ere. Horren ondorioz, egosketa uniformea lortzen da, hondakinak murrizten dira eta azken produktuaren kalitatea nabarmen hobetzen da.
Energia-eraginkortasuna handitu egiten da ziklo bakoitzean behar den potentzia automatikoki erregulatzen delako. Gainera, programak malgutasun handiagoa eskaintzen du, egosketa-denborak optimizatzen ditu eta operadoreen lana errazten du. Oro har, teknologiak gehiago eta hobeto ekoiztea ahalbidetzen du, prozesu arinago eta eraginkorrago baten bidez.