Albisteak
Edukien aurkibidea
Pasaia, 2026ko otsailaren 20a.– Ur-ekosistemek oro har, eta itsasoak bereziki, presentzia mugatua dute hezkuntza-material eta -prozesuetan, baita kostaldeko lurraldeetan ere, hala nola Euskadin. Gabezia horri erantzuteko eta ikasleen eta haien ingurune naturalaren arteko lotura sendotzeko, hezkuntza-ekimen bat jarri da martxan. Helburua da itsas eta ibai-ingurunea eskola-curriculumean modu zeharkako eta praktikoan txertatzea, tokiko errealitatearekin lotuta.
Ekimen hau elkarlanean bultzatzen dute honako erakunde hauek: Itsasmuseum Bilbao, Donostiako Aquarium-a, Plentziako Itsas Estazioa (PiE-UPV/EHU), MATER Ontzi Museo Ekoaktioa, Surfrider España eta AZTI. AZTIk koordinatzaile-lanak egiten ditu GES4SEAS Europako proiektuaren baitan garatzen den ekimen honetan. Erakunde guztiek elkarlanean jarduten dute eragile laguntzaile gisa, eta ikastetxeei beren proiektuak diseinatzen eta garatzen laguntzen diete.
“Ezagutzen duguna bakarrik babesten dugu. Itsasoa ikasgeletara hurbiltzea bide eraginkorra da herritar kontzienteagoak, kritikoagoak eta ur-ekosistemen zaintzarekin konprometituagoak sustatzeko”, adierazi du María C. Uyarra, AZTIko itsaso eta kostaldeen kudeaketan adituak eta sarearen koordinatzaileak.
Euskadiko Eskola Urdinen Sarea da lurraldean Eskola Urdinen garapena koordinatu eta bultzatzen duen ekimena. Sarea estatu mailako egituraren parte da. Era berean, Europako Eskola Urdinen Sarean integratzen da, eta programa osoa esparru komun horren baitan antolatzen da.
Helburua da ozeanoari eta ur-ekosistemei buruzko edukiak eskola-curriculumean txertatzea sustatzea. Halaber, ikastetxeen konpromisoa indartu nahi da haien babesean eta kontserbazioan. Eredua lurraldearen errealitatera egokitzen da, eta hezkuntzaren, ingurumenaren eta jasangarritasunaren arteko lotura sendotzen du.
Sarera atxikitako erakundeek ikastetxeei laguntzen diete itsasoa modu praktiko eta zeharkakoan ikasgelara hurbiltzen duten hezkuntza-proiektuak garatzen. Lan horri esker, ikastetxeek Europako Eskola Urdin ziurtagiria lortzeko aukera dute. Ziurtagiri hori ozeano-alfabetizazioan eta jasangarritasunean egindako lanaren aitortza da.
Sarea pixkanaka eraikitzen da. Ikastetxeek proiektuak garatzen dituzte eta ziurtagiria lortzen dute. Erakunde sustatzaileek, berriz, erraztzaile eta bidelagun gisa jarduten dute. Ezagutza, baliabideak eta ingurunearekiko lotura eskaintzen dituzte.
“Gure helburua da itsasoa ikasgelan presente egotea. Horregatik, ikastetxeak animatu nahi ditugu ekimen honekin bat egitera eta itsas ingurunearekin lotutako diziplina arteko proiektuak garatzera. Diziplina guztiek dute tokia, musikatik zientzietara. Era berean, Eskola Urdin gisa ziurtatzera gonbidatzen ditugu”, azaldu du Euskadiko koordinatzaileak.
Ekimenaren oinarria dira ikasleen parte-hartze aktiboa sustatzen duten hezkuntza-proiektuak. Proiektu horiek eragile espezializatuekin elkarlanean garatzen dira. Amaieran, emaitza zehatzak lortzen dira eta gizartearekin partekatzen dira, hala nola erakusketak, dibulgazio-materialak edo jarduera irekiak.
Parte-hartzea hezkuntza-maila guztietako ikastetxeei dago zabalik, haur hezkuntzatik hasi eta batxilergora eta lanbide-heziketara arte, kostaldeko zein barnealdeko zentroentzat. Ekimenarekin bat egin nahi dutenek informazio guztia eskuratu dezakete proiektuaren webgunean.
Gaur egun, Euskadiko sei ikastetxek jada ikuspegi honetako proiektuak garatu dituzte eta Europako Eskola Urdin ziurtagiria lortu dute. Datozen ikasturteetan kopuruak gora egitea espero da.